About the Server

IlmiyArxiv – bu onlayn ilmiy arxiv va preprint platformasi bo‘lib, u tadqiqot natijalarini tez va shaffof tarzda keng jamoatchilikka yetkazish, ularni uzoq muddat barqaror saqlash va global ilmiy muomalaga kiritish uchun mo‘ljallangan.

Preprintlar — bu jurnalda nashr etilish uchun qabul qilingan, ilmiy ekspertizadan o‘tmagan yoki o‘tgan bo‘lsa-da, nashr jarayonida bo‘lgan ilmiy qo‘lyozmalardir. Qo‘lyozmalarni erta e’lon qilish tadqiqotchilarga o‘z ilmiy izlanishlari natijalarini tezkor tarzda namoyish etish, tadqiqotini jamoatchilik e’tiboriga o‘z vaqtida taqdim etish va Google Scholar orqali iqtiboslikni sezilarli darajada oshirish imkonini beradi.

IlmiyArxiv mualliflarga SciencePro ekotizimidagi jurnallarga — scienceproblems.uz, techscience.uz, medicineproblems.uz, agrovetscience.uz, humansciences.uz, natsciences.uz, lingvoscience.uz va legalsciences.uz — yuborgan ilmiy maqolalarini preprint tarzida bepul joylashtirish imkonini taqdim etadi.

Shu bilan birga, tadqiqotchilar boshqa milliy yoki xalqaro jurnallarga yuborgan qo‘lyozmalarini ham platformaga joylashtirishlari mumkin. Bu ularning ilmiy ishlarini nashrgacha bo‘lgan bosqichda ham keng auditoriyaga yetkazish, natijalarni erta e’tirof ettirish va tadqiqotning ko‘rinishini oshirish uchun juda qulay imkoniyatdir.

IlmiyArxiv to‘liq ilmiy repozitoriy vazifasini ham bajaradi. Platformada dissertatsiyalar, PhD va DSc avtoreferatlari, allaqachon nashr etilgan ilmiy maqolalar, tezislar, konferensiya materiallari, ilmiy hisobotlar, datasetlar, dasturiy kodlar va boshqa turdagi akademik hujjatlar xavfsiz saqlanadi va ochiq tarzda foydalanish uchun taqdim etiladi. Bu ilmiy ishlarni uzoq muddatli raqamli saqlanishi va erkin tarzda taqdim etilishini kafolatlaydi.

Platformaga yuklangan barcha materiallar Google Scholar tizimida indekslanadi, bu esa tadqiqotlarning harakatchanligi, ko‘rinish darajasi va iqtiboslik imkoniyatlarini yanada oshiradi.

Shu tariqa, IlmiyArxiv mahalliy va xalqaro tadqiqotchilar uchun ochiq, erkin, barqaror va ishonchli ilmiy muhit yaratadi.